أنا مش ناشطة عمالية ومش اشتراكية بس فيه حاجات مش محتاجة انتماء ايديولوجي علشان الواحد يدركها بفطرته قبل ما يفهمها بدماغه.. الثورات في كل العالم وعلى مر التاريخ عمرها ما كانت فعل وليد لحظته .. لكنها دايماً بتبقى مجموعة تراكمات بتؤدي في النهاية لشحن وضغط بيولد انفجار .. وبرضه على مر التاريخ كان الظلم الاجتماعي تحديداً بيكون العمود الفقري للتراكمات دي وضحايا هذا الظلم الاجتماعي بيكونوا العمود الفقري للحركة في الشارع.. 

ثورة خمسة وعشرين يناير بالتالي مهياش استثناء، وطبيعي جداً انه لما الحركة بدأت في الشارع مكانش الشباب بس هو اللي بيقودها زي ما الإعلام بيدعي .. بل كمان ضحايا الظلم الاجتماعي (عمال، فلاحين، موظفين حكومة ، باختصار يعني الطبقة الفقيرة والعاملة 

في البداية أيام الاعتصام في التحرير والمظاهرات في كل انحاء مصر كانت الاجواء مثالية جداً، كل التقسيمات الطبقية والجندرية والطائفية مكانتش موجودة.. التحرير تحديدا كان مكان الكل ومكانش حكر على حد.. مفيش تكلف في التعامل ، مفيش تحرش، وفيه روح ود حقيقية كانت سايدة بين الناس في الفترة دي.. 

بس للاسف الشكل المثالي ده مستمرش بعد فض الاعتصام… وبالتدريج ابتدت الثورة تاخد شكل طبقي طائفي بغيض .. وابتدى يبقى فيه إقصاء لفئات معينة لصالح فئات معينة.. وابتدينا نسمع مصطلحات زي “فئوية” بتستخدم بشكل حقير من الإعلام في محاولة أكثر حقارة لفصل المطالب العمالية عن جوهر الثورة وضرب شرعيتها في مقتل. 

بس إن كنت ناسي افكرك يا حلو بقة

1- فاكرين ستة ابريل 2008: اللي دعا للاضراب في الاصل كان عمال المحلة وتبنت الدعوة مجموعات على الانترنت.. أو بمعنى اصح تضامنت معاها.. طب الدعوة للإضراب دي كان سببها إيه ومطالبها إيه؟ مطالبها بالاساس كانت زيادة المرتبات وتحسين خدمات المواصلات العامة والمستشفيات وتوفير الدواء ومحاربة رفع الأسعار والمحسوبية ومحاربة الفساد والرشاوى. صحيح الإضراب منجحش لان أمن الدولة احتلت المصنع لكن الكلام اللي كان داير في الشارع وقتها إن المطالب دي مطالب مشروعة ومفيش خلاف عليها. 

2- فاكرين التمانتاشر يوم بتوع الثورة؟ احنا قعدنا في الشارع وحشدنا وعملنا تلات أو أربع مليونيات ومبارك فضل زي اللطزانة في مكانه متزحزش.. لكن لما الناس ابتدت ترجع شغلها وبدأت حركة العصيان المدني والإضراب العام في مصر كلها في آخر تلات أيام.. المجلس العسكري مكانش قدامه أي سكة تانية غير انه ينحي مبارك وإلا البلد هتنهار.. يعني م الآخر الإضرابات دي هي اللي طيرت مبارك مش المليونيات. 

3- فاكرين بقة قايمة مطالب الثورة: إعادة هيكلة الأجور والعدالة الاجتماعية كانوا دايماً على رأس مطالب الثورة.. فلما العمال في المصانع يطالبوا بزيادة أجورهم وتحسين أوضاع أعمالهم وتطهير مصانعهم ومؤسساتهم من الفساد يبقى فين الانتهازية في كدة؟ فين الفئوية في كدة؟ ما هو كله في النهاية بيصب في خانة العدالة الاجتماعية اللي الناس كلها طالبت بيها وقالت مفيش عليها خلاف. 

السؤال الأهم بقة: إذا كان رئيس الحكومة عصام شرف استمد شرعيته من ميدان التحرير اللي كان قطاع كبير من الموجودين فيه هم العمال والفلاحين والطبقة العاملة بوجه عام، فأي شرعية لقانون تجريم الإضرابات والاعتصامات اللي بالأساس بيحارب الطبقة دي في أكل عيشها وبيحرمها من حقها الطبيعي في المطالبة بحقوقها المشروعة؟ 

والسؤال الأهم كمان: أي قانون ده اللي آلية تنفيذه تبقى حسب التساهيل؟ يعني اطبق القانون لما يكون المعتصمين والمضربين عمال مسالمين واتغاضى عن تطبيقه لما يكون المضربين والمعتصمين مجموعة كبيرة وممكن تكون شايلة سلاح؟ مش دي برضه اسمها معايير مزدوجة ولا أنا بيتهيألي؟ 

أي شخص في الدنيا مش منافق ومبيحطش راسه في الارض ومبيعملش نفسه مش شايف يدرك ان قانون تجريم الاعتصامات مش بس مجحف وآلية تطبيقه فاشلة، ده كمان ضرب صريح في روح الثورة، وآداة من أدوات الثورة المضادة.. لانه في النهاية إذا الثورة مجابتش حقوق لناس زي دول: 

http://www.flickr.com/photos/60329285@N04/5828183315/

http://www.flickr.com/photos/60329285@N04/5828722516/in/photostream

http://www.flickr.com/photos/60329285@N04/5828721570/in/photostream

تبقى قامت علشان مين؟